Everyday Tori (Pidgin): EP 45 – Petrol As Souvenir; E Don Bad Reach That Level?

On top Wetin Dey Happen, we dey chuck mouth for de mata wey shele for Lagos last week ontop gallons of fuel as survenir for party.

We dey ask dis question everytime for our tori…say “how did we get here” but according to one singer, “If you ask me, na who I go ask”. Na so de mata don dey for naija now..o. 

Dis fuel as survenir mata dey like wetin dey happen for Africa magic but na for people Koro Koro eye dis one happen for Lagos.

As de mata come catch fire for social media, Lagos State Government come go dey arrest de pipo wey de mata concern. Dem come even go seal de event centre where de party be happen. 

For our Tori today, una go tell us wetin una tink about dis gallons of fuel ontop survenir mata for Lagos. Say person doo party give pipo wetin dem need as survenir, na crime? If to say fuel nor scarce, dem for use am as survenir? Who we go blame for de mata; de pipo wey collect de fuel, de pipo wey give fuel or government? 

Relationship Corner

Another tori wey we get for ground dis hot afternoon na for our relationship corner. Person send text message put for our phone say she dey plan to marry one rich bobo but de guy say make she carry belle first before e go marry her. De reason be say de bobo say e nor wan marry finish begin do fasting and prayer ontop pikin. She say make we help her chuck mouth for de tori. Say make she agree or make she leave de man? 

Abeg, make una help us chuck mouth for dis tori.

Our Everyday Tori crew go sit down Kanganda today to chuck mouth for de 30min tori. Make una join us chuck mouth.

Make una follow us for our social media handles: Search @LeadershipNGA for YouTube, Facebook and Twitter